سيدي حاكم التحقيق

سيدي حاكم التحقيق باسمي وباسم الشعب التونسي العظيم متاع الثورة (لخرين مايهمكش فيهم مندسين وماسونيين وشرذمة ضالة وحقودين ...) نحب نهني روحي ونهني تونس بالجراة والبسالة والشجاعة والتفاني والاخلاص في العمل الي سيادتك وامثالك قاعدين كل يوم تبرهنوا عليها من خلال رفعكم في الابان قضية ضد جريدة التونسية والصورة الشنيعة والعياذ بالله الي فيها تهجم واضح يعيط يا بابا يامي على مبادئ ثورتنا المجيدة ثورة الياسمين والعنبر والمسك والعطر والسواك الحار والحلو واللبان العربي والحبة السوداء... ، و

نحب نهني روحي والشعب التونسي بوجود ناس كيفك مطمنتنا الي ثمة عيون ساهرة وخايفة وقلبها باش يتخلع على حانوت عطور الثورة التونسية ومتفلت لا كبير ولاصغير من شانو يمس ثورتنا المعطرة

نجموا نرجعوا نستكوزيو على رواحنا هاذي هي المبادئ الي نحبوكم ماترقدوش الليل على خاطرها وتضحيو حتى بقهوة العشرة والحداش ... على خاطرها وبربي كان جاء واحد وقلكم شبي دمكم ماغلاش على مايعيشوا المواطن التونسي من جانفي لتوة طفيه هذاكة يحب يشوش عليكم وعلى الخدمات الجليلة الي تعملوا فيها.

ماكتعرف سيدنا في المجتمعات الكل ديما ثمة فئة ضالة حقودة قال شنوة تؤمن بالحرية والعدالة وكرامة الانسان وهاك الرويق البارد الي ماعندو وين يوصل

والا شيهمنا احنا في حكاية الفساد الاداري الي مازال متواصل والا المتهربين من الضرائب ومازالوا يرتعوا في البلاد والا في بعيض المشاكل الي عايشها التونسي في الخدمة وفي الشارع وفي الصبيطار والا الفلوس الي تصرفت في الانتخابات والي تصرف فيها برشة جمعيات وموش عارفينها كيفاش تلمت والا في الي قالك نورمال الوزرة الكل جابت احبابها واصحابها تخدم والا الفلوس الي مشات وعينينا تغزر والمرشيات الي تخدمت تحت الميدة زادت الغني غنى ورددت برشة سراق ريوس في البلاد والشهداء هاذم الكل تفاهات وامور جانبية

الحاصل سيدنا الليستة طويلة ومانجمش نعاودهالك الكل خاطر هاك الجماعة الي قتلك عليهم والعياذ بالله مايفلتوا لا كبيرة ولا صغيرة باش يشوشوا على الناس الي كيفك والي ماشيين في طريق النور وحاطين الاولويات الحقيقة للبلاد نصب اعينهم وانا مانكذبش عليك سيدنا مانحبش نخالطهم برشة هاك الجماعة والا نعطيهم وذني نخاف نتعدى واهوكة سي المنصف برنوس مؤقت قالك يعرفهم واحد واحد صحيباتو متاع البوليس السياسي الاستخباراتي جابولو فيهم ليستة

الحاصل سيدي الحاكم خليني نمشي نخلط على الكار لازم راك تعرف حال الكيران في تونس حكك السردينة المنقوبة الي تزورنا في الساعة مرة والنقل الريفي والكلندستان الي ضاربين مسد في البلاد والحمد لله

اما موش مشكل الفايدة انت سير سير ونحنا وراك بالبندير
(خنيفسة دنيفسة )