اليوم تفكرت اول كف (صفعة) كليتو بعد ماقالوا الي بن علي هرب ...نهار 14 جانفي كيف هربنا من اللاكريموجان وفقنا الي احنا زادة كان ممكن ناكلو طريحة باهية بالمتراك والا كنا ملي شدوهم في الداخلية، نهارتها مشينا عند جماعة صحابنا يسكنوا قريب وقعدنا نتبعوا في الاخبار وخاصة بالانترنات اش يصير
في الوقت الي قررنا باش نروحوا فيه هبط الخبر متاع منع التجول و بتنا بحذا اصحابنا وعينينا محلولة ليل كامل : شفنا عباد بالعصي والسيوفة تحوس في كماين ماتفهمش تابعين شكون وتخاف تسال، نسمعوا في حس كل مرة نقولو كرتوش والا لاكريموجان؟ زعمة تونسي اخر مات ؟ وبالطبيعة في التلفزة خرجوا الخبر الي الطائرة الرئاسية غادرت تونس
رغم الخوف الي كان راكبنا فرحنا بسنا بعضنا حسيناه انتصار كابوس ومشى ورغم الي ماكانش حاجة كبيرة في الكوجينة نصبنا طاولة بالي موجود وشربنا بكلنا نخب الحرية...
الحاصل نهار السبت 15 في الصباح خرجنا باش نروحوا ورغم الي الوقت كان قريب 10 صاحبتنا الي باش توصلنا اصرت انها تمشي تخدم لانو البلاد مايلزمهاش تاقف كيما قالت
هبطتني في بلاصة قريبة من دارنا وعاودنا بسنا بعضنا من فرحة الي صار، كنا حاسين الي بشكل من الاشكال احنا طردنا بن علي
وفي لحظة كانت اطول بالاحساس بكثير تلفت يمين ويسار نفركس بيعينيه على بقية التوانسة بديت نمشي في الكياس فرحانة نضحك فخورة راسي عالي وقفت في الضو باش لكراهب تتعدى في لحظة تخيلتهم يزمروا فرحانين لكن تصدمت بلي شفتو:
وجوه حايرة حزينة مهمومة تخمم تقول صارت مصيبة في البلاد عمري ماننسى هاك اللحظة وانا الي كنت نتصور روحي باش نشوف الناس كيما في الافلام تغني في الكياس وترقص تعرف والا ماتعرش بعضها موش مهم الفايدة الي ارتحنا من سبب بلانا وتحيا تونس
حسيت وجهي بدا يغماق ويتقبض كيفهم ووقتها عرفت الي ممكن موش الناس الكل فرحانة بلي صار وليت طبست راسي حتى انا وكملت ثنيتي
بعد خطوات تعرضني حضبة متاع عباد لاصقة في حيط وعياط وصياح مافهمتش وقفت شوية طلع الحيط شباك متاع كوشة والرجال ادز والنساء تعارك هو يلزمك تعمل مجهود باش تفهم كل قطعة من بدن لشكون تابعة
قلت ياخي موش عيطنا خبز وماء وبن علي لا؟هاو بن علي مشى اصبروا شوية واتو ييجي الخبز
وكان هذاكة الكف الثاني الي خذيتوا
ومن وقتها وانا ناكل في الكفوف كل يوم كف نوع
كفوف توجع واتعب اكثر ملي في بالي هربت منهم نهار 14
كفوف السياسة وكفوف الدين وكفوف النخبة وكفوف الانتهازية واوجع كف انك تكتشف الي مشكلتنا فينا احنا قبل مايكون مسؤول عليها نظام مستبد
خنيفسة دنيفسة
0 comments:
Enregistrer un commentaire